Klubi Istogu ka dominuar hendbollin e femrave edicionin e kaluar, duke fituar titullin dhe Kupën e Kosovës. Tani Istogu për herë të parë do të luajë në Kupën e EHF-së, pasi dy vitet e kaluara ishte paraqitur në Challenge Cup.
Istogu nuk ka pasur fat në short, ndërsa në raundin e parë kualifikues do të përballet me Gomelin e Bjellorusisë.
Dy skuadrat janë pajtuar që dy ndeshjet të luhen në Gomel të Bjellorusisë, raporton Koha Ditore.
Gomeli është favorit i madh për të kaluar tutje. Ndeshja e parë luhet të premten, nga ora 18:00, ndërsa e dyta të shtunën nga ora 16:00. Istogu ka angazhuar së fundi dy lojtare nga Mali i Zi, Tina Hetemin e Natalija Milatoviqin. Por është pa lojtaren më të mirë, Elma Kameri, që karrierën e ka vazhduar në Belgjikë.
Gomeli ka lojtare reprezentuese të Bjellorusisë dhe Ukrainës, ndërsa në përbërje ka edhe lojtare nga Rusia. Ka përvojë dukshëm më të gjatë në Evropë, ndërsa vjet u paraqit në çerekfinale të Challenge Cup.
"Vajzat tona i pret punë shumë e vështirë. Por ato janë të gatshme të japin maksimumin për të prezantuar hendbollin kosovar në mënyrën sa më të mirë. Vajzat premtojnë angazhim maksimal", thuhet në njoftimin e Istogut. Istogaset para një viti kaluan një skuadër në Challenge Cup.
|